GOOD NEWS UG BAD NEWS SA MOA-AD

GOOD NEWS UG BAD NEWS SA MOA-AD

Mihukom na ang Korte Suprema batok sa Memorandum of Agreement on Ancestral domain sa gobyernong Arroyo ug MILF. Matod sa desisyon nayatakan sa maong kasabutan ang konstitusyon ug napamatud-an nga giabusahan ni Ret. General Hermohenes Esperon ang iyang gahom sa dihang nakigsinabtanay siyang nga pirmahan ang maong kasabutan nga nagtumod sa Mindanao ngadto sa MILF. Patay na ang MOAD ug dili na mapatuman. Mao kini ang GOOD NEWS.

Apan dunay BAD NEWS. Ang mga opisyal nga responsible sa maong dakong salaod sa pagbudhi sa katawhan nga maoy mihaling sa kagubot nga mikalas sa daghang kinabuhi sa Mindanao buhi ug misamot pa ka piskay sa ilang gigunitang gahom. Gikan ni Gloria Arroyo, hangtod sa tanan niyang mga sinugo nga nagpaluyo sa maong negosasyon arogante pa kaayong nagdumala sa nasod nga daw wala gyoy gibating pagbasol bisan gamay sa hilabihan ka dako nilang kasal-anan batok sa katawhan ug sa atong demokrasya mismo.

Makaugalingnon gyod diay ang Korte Suprema. Wala gyod magpadala sa braso sa Malacanang aron madismiss pinaagi sa teknikal nga hinungdan ang kaso ug dili na mahukman ang merito niini sa tumong nga dili madayag ang kalapasan sa konstitusyon nga ilang gihimo. Mibarog gyod ang korte suprema sa baroganan sa katarong ug balaod.Dako kaayong GOOD News.

Apan ang BAD NEWS, nagbitay sa lanot ug huyang kaayo ang maong kaugalingnan sa Supreme Court nga gidominahan karon sa mga tinudlo ni Gloria Arroyo. Tiaw mo bay usa lang ka boto ang nakasalbar sa demokrasya sa atong nasod diha sa kaso sa MOA-AD. 8-7 ang Boto. Sama sa mga nahaunang mga desisyon batok sa kanhiayng mga klaro kaayong kabuang sa gobyernong Arroyo, sama sa desisyon sa Peoples initiative, gadaug lang sa puntos. Inay maghiusa unta ang tanang mga hurado pagtunglo sa usa ka klaro kaayong illegal ug yawan-ong buhat sa administrasyon daghan kanila ug halos magkatunga ang mipili nga kalimtan lang ang ilang kaakohan pagpanalipod sa konstitusyon ug gipili nga panalipdan ang nagtudlo kanila.

Gipadayon ang opensiba batok kang Kumander Umbra Kato, Kumander Bravo. ug mga membro sa MILF nga mihimog mga teroristang buhat batok sa mga sibilyan. Wala na gani palabya sa military ang balaang bulan sa Ramahdan gapadayon gyod sila sa ilang opensiba hangtod pagkakaron batok kang Bravo ug Kato. GOOD NEWS gyod kay tiaw mo bay gitinuod gyod diay ang mga terorista ug wala gyoy pasayloay.

Apan ang BAD NEWS. Inay si Kumander Bravo ug Kato ang madakpan ug mapatay, mga inosente na man hinuong mga sibilyan ang nangaigo ug nangamatay, gatosan ka milyon ang danyos sa kabtangan sa maong opensiba. Gilusob nila ang daghan kaayong kampo sa MILF apan walay bisan anino na lang ni Bravo ug Kato nga ilang nakita.Pila ka milyon na kaha ang gigasto sa gobyerno sa maong opensiba nga modagan nag usa ka bulan ug tunga, daghan nang mga sundalo nga namatay uban sa mga sibilyan apan walay bisan usa ka lawas sa teroristang MILF muna nilang pagarpar nga nakapatay pod kuno sila. Duha na karon ka grupo ang giakusahan nga terorista ang MILF ug ang Militar. Ug sa ilang pagdula ug dakpanay intawon libo ka libong sibilyan ang natumban ug nabanggaan.

Napuhag na kuno ug dili na makaporma ang mga MILF kay nailog na ang ilang mga kampo ug nagkatibulaag sila.GOOD NEWS! Nindot nga balita kay sila baya ang labing gikahadlokan grupo karon diri sa Mindanao.

Apan ang BAD NEWS, una pang napuhag ug nagkatibulaag ang katawhan sa Mindanaw. Una pang nalugtab ang daghan na unta kaayong maayong kutay sa relasyon sa mga moro, kristiano ug lumad dinhi. Ang kanhiayng nag-ambanhan nga mga silingang mga muslim ug kristiano nagsugod na pagdudahay , pagkahadlokay sa usag-usa. Libo ka libong panginabuhi ang napukan ug gibiyaan ka yang liboan ka mga banay midagan ug namakwit mahilayo lang sa padayong kakuyaw. Ug hangtod pagkakaron padayon pa ang kadaot sa kabtangan ug kinabuhi sa katawhan labi na sa mga komunidad nga moro nga basta na lang gihabas sa mga tropa ug tangke de giera, gipaulunan ug bomba sa mga areplano ug helicopter nga nangita lang kang Kumander Bravo ug Kato. Ug wala gyoy Bravo ug Kato nga nakita na man lang.

Sa desisyon sa MOA AD gimandoan sa Korte Suprema ang kagamhanan nga mangunsolta na gayod sa katawhan kun ipadayon pa niini ang mga kalihokan sa pagsabotsabot sa kalinaw dinhi sa Mindanaw. Magpahinumdom gyod ni sa mga namunoan nga usa kita ka nasod nga demokrasya nga dili mahimo nga pipila lang ang magbuot ug mohukom ug itingal lang dayon ang ilang gusting mahitabo sa katawhan. GOOD NEWS ang maong unto sa desisyon.

Apan ang bad news wala gayoy timailhan nga makita diha sa atong kagamhanan karon nga tumanon ang maong kamandoan. Ang subli-subli nga kasinatian nato uban ning maong burukintong administrasyon nga mas gituman sa mga namunoan ang bisyo ug kapritso niini sa paghakop ug pagunit sa gahom ug andam kining moyatak sa konstitusyon, balaod aron lang maseguro ang ilang personal nga interes. Wala nay laing gitahod ug gisunod kining gobyernoha kundili ang yawan-ong bisyo niini sa kadalo ug pagpahimulos sa gahom nga temporaryong gisalig ngadto kanila sa katawhan.

Ug pagkakaron ang kabus nga mindanawnon intawon nabuyong na lang ug nalibog samtang nagsaksi sa pas pas kaayong pagsunod-sunod sa mga hitabo .Unsa ang ilang buhaton. Kinsa ang ilang dangpan. Hilabihan ka dulom sa ilang unahan. Patay na tuod ang MOA AD apan dako pang buhi ug misamot kalig-on ang mga tawo nga maoy nagpaluyo niini. Wala mapapas ang MILF, wala madakpi bisan na lang anino ni Bravo ug Kato. Ug ang military nga pagkakaron nagpataka lang pagpangatake wala pa gayod mabakwi sa daotang imahe sa kapakyasan, sa pagtanga ug walay gibuhat ug wala gyod nila panalipdi ang mga inosenteng sibilyan nga gipamatay sa MILF sa pagpangatake niini. Sama sa MILF sila wala na saligi sa daghang sibilyan karon. Sila ang ilang gikahadlokan ug dili ang MOA-AD. Sila ang hinungdan ug naghaling sa kasamok ang MOA Ad mao lang ang usa sa ilang hinagiban.

Manaa o mawala man ang MOA AD ang tinuod nilang gikahadlokan mao mga teroristang puwersa nga hangtod karon wala pa gayod makat-on paghatag ug tinuod nga bili sa interes sa ug mihimo lang hinuon niining salimbong sa ilang hinakog nga mga tinguha. Mga personalidad nga wala gyoy pagtahod sa bili sa kinabuhi sa mga inosenteng sibilyan nga makalas sa ilang pagduladula sa gahom. Kun pasultihon morag kinsa nga mga mesiya. Apan ang sulod sa ilang kasing-kasing ug ang ilang binuhatan hilabihan ka yawan-on. Sila ang tinuod nga mga terorista. Sila ang tinuod nga hinungdan sa padayong kabalisa ug kahadlok karon diri sa Mindanao. Sila ang mga teroristang elemento sa MILF ug mga yawan-ong mga opisyal gobyerno nga nagtugot aron mahaling , ug molipang ang kagubot sa Mindanaw.

Legal Information

Pangutana: Sa unsang paagi nga ang usa ka tawong kabus malibre sa pagbayad sa filing fee sa kasong sibil sa korte?

Tubag. Ang iyang himoon mao lang ang pagpasaka ug mosyon aron tugotan siyang moatubang sa kaso isip indigent party. Kinahanglang isukip niya sa mosyon ang certification gikan sa treasurer sa lungsod ug siyudad diin siya nagpuyo nga wala siyay gipanag-iya nga yuta uban sa uban pang pruyba kun duna pa may lain nga momatuod nga siya pobre gayod.Kun tugotan sa Korte ang iyang mosyon ilhon na siyang indigent party ug dili na pabayaron sa mga bayronon sa hukmanan.