ASA NA ANG MGA MANLALABAN?

Gipahigayon niadtong miaging Sabado ang dungan nga piniliay sa tanan nga mga Chapters sa Integrated Bar of the Philippines sa nagkalainlaing mga probinsya ug syudad sa Pilipinas. Ang bag-ong hut-ong sa mga pinili nga opisyal niining nasodnong nga kapunongan sa tanan nga mga abogado moalagad sulod sa mosunod nga duha ka tuig nga termino. Ug gikan sa mga chapter presidents sa IBP pillion usab ang nasodnon nga mga opisyal nga mao ang maglangkob sa hunta nga langkoban sa 9 ka mga gobernador nga maoy magpila kinsa kanila ang mahimong nasodnong Presidente sa maong organisasyon.
Ang Integrated Bar of the Philippines usa ka kapununongan nga namugna pinaagi sa Republic Act no. 6397, sa dihang gimbut-an sa Supreme Court ang mga tamdanan sa paghiusa o rules of integration of the Philippine Bar ug gipakanaug ni kanhi Presidente Marcos ang Presidential Decree 181 nga maoy pormal nga nagtukod ug naghatag ug usa ka hingpit nga organisasyon sa paghatag niini ug personalidad isip usa ka grupo diha sa balaod. Si anhing Associate Justice Jose B.L. Reyes nga mao ang unang nangusog aron gayod mahimo usa ka organisasyon ang mga abogado sa tibuok nasod mao ang nahimong labing una nga Presidente sa maong kapunongan.
Gikan niadtong panahona hangtod pagkakaron ang IBP padayon naningkamot diha sa kahiusaan sa mga abogado aron magamit ang propesyon sa balaod sa tukma nga tumong niini diha sa pag-alagad sa hustisya. Pagkakaron duna nay kapin kun kulang 40,000 ka mga abogado nga membro sa tibuok nasod. Pinugsanay kining maong organisasyon. Human mahimong abogado, ang usa ka manlalaban obligado nga magpamembro sa IBP, ug obligadong nga magpabilin matarong nga membro diha sa pagbayad sa iyang mga annual dues ug uban pang balayronon ug buluhaton, kay kun mapakyas siya mahimong mapahawa siya sa maong organisasyon ug bahason usab ang iyang lisensya pagkaabogado. Ang IBP mao usab ang tahasan sa Korte Suprema sa pagimbestigar ug pagrekomendar sa tukmang silot sa usa ka abogado nga gireklamo ngadto sa Supreme Court tungod sa iyang mga kasaypanan sa propesyon.
Bisan diha sa pagpili sa mga aplikante sa pagkahuwes, dako kaayong papel ang Integrated Bar of the Philippines. Base sa atong konstitusyon, ang IBP usa sa mga sector nga naglangkob sa gitawag nga JBC kun Judicial and Bar Council . Ang JBC mao ang institusyon nga gitahasan diha sa paghashas sa mga aplikante sa pagkahuwes ug mohimo sa nominasyon sa mga aplikante gituhoan niining maoy labing angayan aron pilian sa Presidente nga mao ang dunay gahom paghimo ug katudloan o appointment sa usa ka huwes.
Base sa Legal Ethics ang mga abogado dunay upat ka mga batakang buluhaton ug kaakohan. Ug kini mao ang mosunod-
Una sa tanan siya dunay kaakohan ngadto sa iyang kliente. Iyang buluhaton ang paglaban kaniya sa tanan nga iyang mahimo, sa tumang kamatinud-anon, ginamit ang tanan niyan g kakugi ug katakos abay sa balaod ug katarong;
Ikaduha duna siyay kaakohan ug tulubagon ngadto sa Hukmanan. Sa balaod siya giila isip opisyal sa korte kun officer of the court. Kinahanglang kanunay siyang magmatinahuron sa hukmanan ug moabag niini aron dali nga mahuman ang kaso. Iyang likayan ang mga buhat nga makalangan sa kaso o makalingla sa hukmanan aron dili niini matugkad niini ang tinuod nga balor sa balaod ug hustisya;
Ikatulo ang usa ka abogado dunay kaakohan ug tulubagon sa iyang kaubang mga abogado. Kinahanglang magmahigalaon siya kanila. Kinahanglang bukas siya sa pagpakig-ambit kanila ug likayan niya ang mga buhat nga maghaling ug panag-away nga personal tali sa iyang kaubang mga abogado. Magbangi ug magdebate man sila sulod sa hukmanan apan kinahanglang gamiton nila ang matinahuron ug desente nga mga pulong, ug sa gawas kinahanglang maayo ang ilang relasyon;
Ikaupat- ang abogado dunay kaakohan sa katilingban ug komunidad nga iyang gipuy-an. KInahanglang magbaton siya ug maayong dungog atubangan sa katawhan aron ilhong panig-ingnan sa katarong ug kaangayan. Ug kinahanglan nga iyang ipaambit ang iyang katakos ug kinaadman alang sa reporma ug kausaban sa katilingban. KInahanglang manguna siya sa mga kalihokan nga nagtumong sa pagpanalipod sa interes sa kinabag-an. Sa laktod nga pagkasulti kinahanglang magmaalagaron siya sa ubang tawo.
Kini base sa bug-at kaayo nga katilingbanong kaakohan o social responsibility sa propesyon sa pagkaabogado. Kining maong propesyon, sukwahi sa pagtuo sa uban, balaanon ug nakabase sa kaakuhan sa pagsangyaw sa kalinaw, nungka sa panagbangi, sa pagbarog sa kamatouran, nungka sa pagtuis niini, sa pagalagad ug paglaban sa mga dinaugdaug, nungka sa pagpamentaha o pagamit ba kaha niini aron tumban o tugotan nga tumban ang katungod sa uban.
Aron matuman kining maong bug-at kaayo nga mga kaakohan sa usa ka abogado gipakanaug sa Korte Suprema ang daghan kaayong mga lagda ug tamdanan aron subayon sa mga manlalaban . Gikan pa sa mga lagda sa Rules of Court,Legal ethics, sa liboan na ka mga kamandoan ug circulars nga gipakanaug. Apan bisan pa niining tanan, hangtod pagkakaron wala pay klarong pruyba nga ang kapin sa kuwarenta mil ka mga abogado sa atong nasod nagtuman ba niini.
Hinuon dili ikalimod nga samtang midaghan ug samot ang mga abogado sa atong nasod misamot usab hinuon ka daghan ang inhustisya ug panaugdaug. Nganong sa kadaghan na sa mga abogado sa atong nasod maihap man lang intawon sa tudlo ang makitang diniyos gyod nga nagtuman ning maong kaakohan. Nganong ang daghan kanila nalinga ra man kaayo sa pagpangita sa kinabuhi ug personal nga tingusbawan ug nasuwaw sa sidlak sa bulawan ug wala nang kakita sa daghan kaayong kadaotan sa katilingban diin sila gitawag aron mag-una sa pagpakigatubang?
Asa na ang mga manlalaban? Asa na ang mga tawo nga base sa ilang propesyon gimandoan sa pag-una diha sa tinuod nga pagbarog aron makalingkawas ang katawhan nga hapit na malunod ug malumos niining hilabihan na ka lang-og nga lapok sa pagpahimulos ug kadaotan sa mga namunoan ug sa nagharing hut-ong?Asa na ang mga abogado nga base sa ilang katakos, kinaadman ug puwesto sa katilingban gilaoman nga manguna sa paningkamot nga mabanhaw ug mabangon ang himalatyong demokrasya sa atong nasod?
Unta ang bag-ong hut-ong sa mga napiling opisyales uban namong mga sakop sa Integrated Bar of the Philippines makagahin unta ug seryosong paningkamot aron matubag ang maong mga pangutana.

Legal Information
Pangutana: Mahimo bang kasohan o silotan ang mga membro sa usa ka kulto nga nagampo sa satanas?
Tubag: Dili. Ang atong konstitusyon nanalipod sa kagawasan sa pagtuo. Walay balaod ni gobyerno nga makapanghilabot sa usa ka relihiyon o kulto bisan kinsa pa ang giampoan o gituhoan niini. Hinuon kun ang maong kulto o relihiyon mohimo nag mga butang nga supak sa balaod ug makadaot sa katungod sa uban sama sa pagpatay, panglugos ug uban pang krimen. Mahimo na silang silotan ug patubagon sa balaod.
javascript:void(0)