GOODBYE NICOLE!

BALAOD UG KAMATOURAN
Ni:

Atty. Ver Quimco

GOODBYE NICOLE!

Niadtong miaging semana gikataho ang pagpakig-areglo sa biktima sa kasong Rape nga si Nicole ngadto sa sinumbong nga amerikanong Sundalo nga si Daniel Smith. Kini gimatuod mismo sa abogado ni Daniel Smith sa dihang mihimo siyag pormal nga pagpadayag ngadto sa Court of Appeals diin nakapending ang ilang apelar sa maong kaso. Dili lang kuno usa ka gatos ka libo ang nadawat ni Nicole kundili kantidad nga mokabat ug P200,000.00 ang tanan agig pagtuman sa kamandoan sa Regional Trial Court nga bayaran ang civil indemnity o danyos ngadto kang Nicole base sa desisyon niini nga nagkonbikto kang Smith.
Didto sa Court of Appeals gisubmite usab sa abogado ni Daniel Smith ang usa ka affidavit of retraction, pinanumpaang pamahayag nga nagbakwi sa iyang testimonio didto sa hukmanan nga maoy hinungdan sa pagkakonbikto ni Smith. Sa maong affidavit gipahamayag nga siya nagduda na kun rape ba gayod ang nahitabo kaniya ug ni Daniel Smith. Matod pa niya nga hubog kaayo siya niadtong gabhiona ug mahimong nahikalimot siya, o nakahimo siyag mga butang nga dili na angayan, o mahimong sila ni Daniel Smith nadala na sa tental sa kahigayonan.
Gawas niini pinaagi sa usa ka sulat nga gitunol sa inahan ni Nicole, iyang gitapos ang serbisyo sa iyang abogado nga si Atty. Evalyn Urzua, ug tungod niini dili na kini mahimong makabarog alang kaniya sa kaso. Milarga siya ngadto sa Estados Unidos aron makigminyo sa usa ka laing amerikano nga iyang nahimo na niyang hinigugma.
Kining maong balita migawas sa dihang init na kaayo ang siyagit sa mga nagpakabanang sector ug bisan pa sa mga magbabalaod nga irebisa ug estoryahan pagbalik sa Pilipinas ug Amerika ang Visiting Forces Agreement nga tin-aw kaayong nagpihig batok sa mga Pilipino. Ang kaso ni Nicole maoy naghulagway niining maong kahimtang. Nga bisan unsa pa diay ka dako sa krimen nga mahimo sa usa ka sundalong amerikano nga mianhi dinhi sa Pilipinas base sa VFA dili man gyod siya mapatubag sa silot sa balaod. Ug kini mao ang nahitabo kang Daniel Smith nga bisan kun dugay na kaayong nakonbikto, ug bisan duna nay mando ang Supreme Court wala gihapon mabilanggo ug naa giproteksyon kanunay sa embahada sa Amerika.
Tungod ning maong kalamboan sa kaso ni Smith, daghan na kaayong mitumaw nga pangutana. Kang Nicole ba gayod ang maong affidavit?. Kun iya man gawasnon ba niyang kabubut-on ang pagpirma niini, o nahaylo lang siya sa dakong kantidad nga gihanyag kaniya.? Tinuod ba nga Dosentos Mil pesos lang ang gibayad kaniya.? Dili ikalalis nga ang mao niyang affidavit ug ang iyang desisyon sa pagpapapha sa iyang abogado nga si Atty. Urzua maoy nahimong bugti sa maong kantidad.Ug dili usab ikalalis nga ang maong affidavit gihimo ang daan sa kampo ni Smith ug igo lang siyang gipapirma. Apan nganong mipima man siya niadto?. Human niya latasa ang daghan kaayong kalisdanan kanhi. Human niya atubanga ang hilabihan ka higanteng puwersa nga nagpaluyo kang Daniel Smith nga mao mismo ang kagamhanan sa nasod sa Amerika. Human niya barogi bisan pa ang mga piskal nga daw tua na hinuon modapig kang Smith didto sa husay sa Korte. Human sa tanan niyang sakripisyo ug sa daghan kaayong mga tawo nga miunong kaniya. Human sa malamposong pagbarog sa hukmanan nga maoy nakakabig sa simpatiya ug pagtahod sa katawhan ngadto kaniya ug sa mga Pilipina nga iyang girepresetahan. Human masugdi tungod sa iyang kaso ang pagtuki niini dako kaayong isyu sa pihig nga relasyon sa Pilipinas ug Amerika diha sa Visiting Forces Agreement. Mag-ing-ana siya sa dakong kasayon?
Apan ang balaod ug mga doktrinang gipakanaug sa Korte Suprema nga haom sa kahimtang sa kaso ni Nicole klaro ug lisod matuis. Ang usa ka affidavit of desistance kun affidavit of retraction, o ang bisan unsang pagbakwi sa panestigos human moatubang sa hukmanan ang usa ka testigos lisod nga tuhoan sa Korte. Sa mga pulong pa ni kanhi Senador Jovito Salonga nga giila nga usa sa mga labing batid nga abogado sa atong nasod, ang maong affidavit ni Nicole sama lag usa ka walay pulos nga papel o “scrap of paper”. Ug dili gyod makonsidera sa Court of Appeals pagkakaron. Unsaon man pagtuo niini sa Korte nga wala man gani kini mapresenta didto sa ubos nga hukmanan. Unsaon man paghatag ug gibug-aton niini karon sa Court of Appeals nga wala na man gani magpakita sa Nicole nga kinahanglan pang moatubang aron imatuod nga iya gayod ang maong affidavit base sa proseso sa husay. Ang maong kalamboan kun suhiran lang gayod ang tamdanan sa balaod dili makabakwi sa desisyon nga nagkonbikto kang Daniel Smith. Kani mas makapasamot pa kini kalig-on sa kaso batok kaniya kay ang pagpakig-areglo baya sa mga kasong kriminal mahimo mang ilhon nga pruyba sa kasal-anan. Ug ang paghatag ni Daniel Smith ngadto kang Nicole sa kantidad nga gihukom batok kaniya sa ubos nga hukmanan dili ba usa ka pag-uyon nga siya nakahimo gayod ug kasal-anan batok sa biktima?
Tinuod kun atong ibase sa balaod walay epekto ug dili gyod makabakwi kining affidavit of desistance ni Nicole nga giduso ni Daniel Smith ngadto sa Court of Appeals bisan unsa pay pamahayag nga sulod niini.Apan kana sa balaod lang. Ning kaso nga naa karon sa Court of Appeals sayod kita nga dili lang balaod ug ebidensya ang nahilambigit. Luyo ug nagpahipi niini ang dako kaayong puwersa ug mga interes sa gobyernong Pilipinas ug Amerika. Mga puwersa nga base sa balaod angay unta molaban sa makaluoluoyng biktima nga sama ni Nicole apan naa, daw nakigkonsabo na hinuon aron lang maseguro ang ilang mga dinagko nga mga politikanhong interes. Ug sa matang sa hustisya nga nia kanato makalaom kaha kita nga mopatigbabaw gyod ang balaod ug kamatouran diha karon sa Court of Appeals. Karon nga wala na si Nicole . Karon nga iya nang gipapha si Atty. Ursua, ug ang nahibilin mao na lang ang abogado sa sinumbong, ug ang gobyernong Arroyo mga prosecutors sa kagamhanan nga kaniadto pa lang mipadayag na nga wala nay interes ug kaikag nga mopadayon sa kaso.
Dili gayod makaapekto sa naapelar nga kaso kining pagbakwi ni Nicole human makonbikto si Daniel Smith kun subayon ang balaod. Apan sa matang sa hustisya ug kagamhanan nga nagdumala kanato karon, ang tanang butang mahimong himoon ug mahitabo subay man o supak sa balaod basta maalagaran lang ang gusto sa mga nagunit sa gahom!
Wala na si Nicole. Unta dili mahanaw uban kaniya ang hustisya nga kanhi iyang gipakigbisogan. .

Legal Information
Pangutana: Unsay kahulogan sa affidavit of desistance?
Tubag: Ang affidavit of desistance mao ang usa ka pinanumpaang pamahayag sa usa ka nagsumbong sa kaso nga nagpadayag nga dili na siya interesado ug mosibog na siya sa kaso. Sa dili pa masugdan pagpresentar ang ebidensya sa usa ka kasong kriminal mahimo kining basehan aron madismiss ang kaso. Apan kun natapos na ang husay, ilabi na kon nakonbikto o naapelar na ang kaso sama sa kaso ni Daniel Smith dili na kini mahatagan ug pagtagad.