SI GLORIA, SI MERCEDITAS UG ANG IMPEACHMENT

“If she’s a bitch, she must be one lucky bitch”. Kini ang kontrobersiyal nga pamahayag ni Albay Governor Joey Sialcita sa usa ka economic forum nga iyang gitambongan sa Makati City niadong miaging tuig agig paghulagway kang Presidente Gloria Macapagal Arroyo. Bisan nangayo siyag pasaylo ug mipatin-aw nga lahi ang iyang gipasabot , ang maong paghulagway gisabot sa kadaghanan sa ilang kaugalingong pagtan-aw nga kun sama sa usa ka burikat kuno ang atong Presidente usa siya ka palaran nga burikat.
Tiaw mo bay gawas lang ni Marcos siya ray Presidente nga nakapuyo sa Malacanang sobra sa 8 ka tuig. Nasulod siya sa maong puwesto sa usa ka kuwestionable kaayong proseso sa Edsa Dos, nga migubot sa pundasyon sa atong mga balaod. Wala magdugay ang iyang hanimon sa katawhan human sa Edsa II nahimo siya usa ka salawayon ug tinamay nga lider tungod sa daghan kaayong anomalia ug abuso sa iyang administrasyon nga dayag kaayong nasayran sa katawhan.Apan inay mawala sa mapa sa Politika hingdaug na man usab hinuon ug laing termino sa usa ka kuwestionable kaayong eleksyon sa 2004, nga misangpot sa kontrobersiya sa helo garci scandal. Makapila na gihagit ang iyang gahom gikan sa mga puwersa sa balaod bisan pa sa mga puwersang ekstremista apan taliwala sa daghan kaayong mga hagit ug pagsulay sa mga puwersa nga gustong mopapahawa kaniya sa malacanang, naa pa siya. Hilabihan pa ka piskay ug kakiat atubangan sa kalagot sa katawhan kaniya.Sa daghan na kaayong mga survey nga gihimo napadayag nga hilabihan na kaayo kadako ang as a ug pagkawalay pagsalig sa katawhan kaniya. Apan naa pa siya. Mosugot kitag sa dili siya ang atong Presidente. Siya ang nagunit sa labing taas ug bug-at nga politikanhong gahom sa atong nasod.
Apan wala siya maginusara. Uban sa iyang suwerte ang mga tawo nga naa nagpasailong sa iyang saya. Kadtong mga tawong andam malimot sa ilang prinsipyo ug mohimog daotan para makakuyog lag lupad sa iyang gahom. Gikan sa iyang kontrobersyal nga bana, hangtod sa tanan niyang mga alyado nga hangtod pagkakaron nakaambit sa iyang paghapok sa demokratikanhong gahom ug nagpahimulos sa iyang politikanhong proteksyon.
Usa kanila si Merceditas Guttierez ang Ombudsman sa atong nasod nga tinudlo mismo ni Gloria ug giilang kaklase sa iyang banang si First Gentleman Mike Arroyo
Sama sa kahimtang ni Gloria, suwerte ang mihatod kang Merceditas Guttierez sa Ombdusman. Si Guttierez wala gayoy abilidad o birtud nga sarang tahoron siya sa katawhang pilipinhon ug himoong angayang nga mogunit sa dako kaayong puwersto pagkaaombudsman. Pagkadaghan pa baya sa mga abogado nga mas angayan ug mas may katakos pa ni Ni Guttierez apan siya gayod ang natudlo ni GMA sa maong posisyon. Apan lagi kay suod sa dughan ni GMA ug klasmet pa sa iyang bana nakuha niya ang maong puwesto. Sa tanang panahon sa iyang pagkaombudsman wala gyod madungog si Guttierez nga mibarog aron himoon ang iyang trabaho sa pagsumpo sa mga kasaypanan sa kagamhanan. Hinuon ang publiko nagtuo na nga siya mao ang protector ni GMA ug sa tanan niyang kaalyado, ug tiglutos sa mga kaatbang sa administrasyon.
Kun salawayon ang buhatan sa Ombudsman niadtong panahon ni kanhi Ombudsman Aniano Disierto sa paahon ni kanhi Presidente Ramos pagkakaron si Ombudsman Guttierez nahimo nang sama sa iyang agalon sa Malacanang- tinunglo sa katawhan. Gikan pa niadtong pagpugong ug palubog niya sa kasong suborn batok kang kanhi Justice Secretary Hernando Perez nga sinaligan gihapon ni GMA, sa pagtuis kaso Mega Pacific solutions sa surambao nga bidding sa computerization nga mismo Korte Suprema na ang medeklarar nga binuang, ZTE scam, fertilizer scam, ug daghan pang ubang mga kaso, labing ulahi niini ang kapin sa tuig niyang pagdumili pag-aksyon sa World Bank Report nga naglambigit sa mga korator nga mga kontraktor nga Insik ug Pilipino nga nakigkonsabo ni Mike Arroyo. Kining tanan naghulagway dili lamang sa kapolpol kundili sa kadaotan na mismo sa imahe sa Ombudsman. Kun unsa ka salawayon ang gobyernong Arroyo, mao usab ka wala nay klaro pangalagad ni Merceditas Guttierez nga gani tungod niini mismo si kanhi Senador Jovito Salonga na ang nanguna ug mikuyog sa panon sa mga mipasaka ug impeachment batok kaniya didto sa kongreso.
Apan kun unsa ka gahob ang publisidad niining impeachment case nga gipasaka batok kang Merceditas Guttierez, kita nasayod nga wala gyod kini kapaingnan kun ibase lang sa ordinaryong dagan sa maong proceso. Ang politikanhong kasinatian sa atong nasod ug bisan pa sa Amerika diin gikopya kining bugtong pamaagi aron mapatubag ang Presidente ug ang mga tag-as nga opisyal sama ni Guttierez sa ilang mga krimen ug kasalanan sa trabaho. May mahadlok pa sa impeachment?. Bisan makausa wala pay Presidente sa Pilipinas ug bisan pa sa Amerika nga napapahawa tungod sa impeachment. Bisan pa gani si kanhi Presidente Estrada nga nataral na sa Senado wala gyod mahukmi sa impeachment nga gipasaka batok kaniya. Nanaug siya sa Malacanang tungod sa puwersa sa mga sector nga nagsinggit batok kaniya ug dili tungod kay nahukman siyang sad-an sa impeachment.
Kinsa bay mahadlok sa impeachment nga bisan gani mismo si Presidente Arroyo kapila na sublisublii ug pasaka ning maong kaso diin bug-at kaayo ang mga pruyba ug ebidensya batok kaniya wala man gyod matarog. Si GMA maoy buhing pruyba nga sayon ra kaayong patyon ang impeachment, kay kun naa lang ka sa gahom dali ra kaayong tukoyon ang mga kongresman nga paonan lang ug pork barrel. Dili ebidensya ang sukdanan sa husay sa impeachment kundili kuwarta ug politika. Ug sa matang sa panghunahuna ug kinaiya nga gibatonan karon sa atong mga Senador ug Kongresman walay mapaabot nga mopatigbabaw ang kamatouran ug hustisya sa maong matang sa husay. Hugay lang sa politika. Political scarecrow. Panghadlok lang ug wala nay nahadlok ug maglaom pa sa proseso sa impeachment.Maong bisan nataranta ug daw bata nga nga nagpataka na lang ug panubag sa media si Guttierez ,luyo sa iyang naglibog nga dagway naa ang pagsalig nga dili siya pasagdan sa iyang agalon ug sa pagtak-op unya sa adlaw ibasura gihapon kining impeachment batok kaniya ug magpabilin siya sa iyang puwesto ug gahom.
Ug ning maong kahimtang dili lang unya kitang mga Pilipino ang moyubit sa atong kagamhanan ug mawad-an ug paglaom sa atong mga demokratikanhong institusyon, kundili ang mismo na ang mga langyawng bankong tigpahulam ug ang tanang katawhan sa tibuok kalibotan.
Kita nagdayeg ug nagsimpatiya ning kalihokan ni Jovito Salonga ug sa mga hugpong nga nagpasakag impeachment ni Guttierez. Apan kita ug bisan pa sila nasayod nga milagro lang ang makahatag niinig kalamposan diha sa Kongreso.
Pagkasuwerte ni Merceditas !Pagkahayahay ni Gloria!
Pastilan kademalas na gyod natong tanan!
Legal Information
Pangutana: Unsa kining Anti-VAWC law?
Tubag: Ang Anti-VAWC Law kun Anti-Violence Against Women and their Children Act mao ang balaod nga nanalipod sa kababayen-an ug kabataan batok sa mga tawo nga ilang gikarelasyon bana man, kapuyo, uyab, o kabit, o kanhi bana, kanhi kapuyo, kanhi uyab, kanhi kabit o karelasyon. Kining maong balaod nagpahamtang ug taas nga silot dili lamang sa mga buhat nga nagpasakit sa lawas, pagpasakit sa pagbati, pagpahimulos nga sekwal ug ingon man paghikaw sa katungod nga ekonomikanhon sa usa ka asawa.